ໄວຣັດໂຄໂລນາ ມີຜົນກະທົບຕໍ່ການທ່ອງທ່ຽວ

   ພາຍ­ຫຼັງ​ທີ່​ເກີດ​ມີ​ສະ­ພາບ​ການ​ລະ­ບາດ​ຂອງ​ພະ­ຍາດ​ອັກ­ເສບ​ປອດ​ເຊື້ອ​ຈຸ­ລາ​ໂຣກ​ສາຍ​ພັນ​ໃໝ່

 ຫຼື (ໄວ​ຣັສ​ໂຄ​ໂຣ​ນາ) ທີ່​ເກີດ​ຢູ່ ສປ ຈີນ ແລະ ໄດ້​ແຜ່​ລາມ​ໄປ​ຫຼາຍ​ປະ­ເທດ​ໃນ​ໂລກ ອັນ​ໄດ້​ເຮັດ​ໃຫ້​ກະ­ທົບ​ຕໍ່​ຫຼາຍ​ບັນ­ຫາ ເປັນ­ຕົ້ນ ເຮັດ​ໃຫ້​ມີ​ຄົນ​ເຈັບ­ເປັນ​ເສຍ​ຊີ­ວິດ ດ້ານ​ເສດ­ຖະ­ກິດ ແລະ ການ­ທ່ອງ­ທ່ຽວ ຍ້ອນ​ມີ​ການ​ຈຳ­ກັດ​ການ​ເຂົ້າ-ອອກ​ຂອງ​ຄົນ​ພາຍ​ໃນ ແລະ ຕ່າງ­ປະ­ເທດ ຈຶ່ງ​ເຮັດ​ໃຫ້​ຈຳ­ນວນ​ນັກ​ທ່ອງ​ທ່ຽວ​ທີ່​ໄປ​ທ່ອງ​ທ່ຽວ​ແຕ່​ລະ​ປະ­ເທດ​ຫຼຸດ​ລົງ​ໄປ ເວົ້າ​ລວມ ເວົ້າ​ສະ­ເພາະ ຈຳ­ນວນ​ນັກ​ທ່ອງ​ທ່ຽວ​ທີ່​ເຂົ້າ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ພະ​ທາດ­ຫຼວງ​ວຽງ​ຈັນ ວັດ​ສີ­ສະ​ເກດ ແລະ ຫໍ­ພະ­ແກ້ວ ເຫັນ​ວ່າ​ປັດ­ຈຸ­ບັນ​ເລີ່ມ​ມີ​ທ່າ​ອ່ຽງ​ຫຼຸດ​ລົງ.

 ທ່ານ ພູ​ວຽງ ໂພ­ທິ​ສານ ອຳ­ນວຍ​ການ​ພິ​ພິ​ທະ​ພັນ​ສະ­ຖານ​ບູ­ຮານ ນະ­ຄອນ­ຫຼວງ​ວຽງ​ຈັນ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ວັນ​ທີ 4 ກຸມ­ພາ ນີ້​ວ່າ: ພວກ​ເຮົາ​ໄດ້​ມີ​ການ​ຄຸ້ມ​ຄອງ 4 ແຫຼ່ງ​ທ່ອງ​ທ່ຽວ​ຄື: ພະ​ທາດ­ຫຼວງ​ວຽງ​ຈັນ ວັດ​ສີ­ສະ​ເກດ ຫໍ­ພະ­ແກ້ວ ແລະ ຫໍ​ຫຼັກ​ເມືອງ​ວຽງ​ຈັນ ແຕ່​ເປີດ​ບໍ­ລິ­ການ​ເກັບ​ປີ້​ເຂົ້າ​ຊົມ​ມີ​ແຕ່ 3 ແຫ່ງ​ຄື: ພະ​ທາດ­ຫຼວງ​ວຽງ​ຈັນ ວັດ​ສີ­ສະ​ເກດ ແລະ ຫໍ­ພະ­ແກ້ວ ສະ­ເພາະ​ປີ 2019 ມີ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ 3 ແຫ່ງ​ນີ້​ມີ​ທັງ​ໝົດ 726.065 ຄົນ ໃນ​ນັ້ນ ນັກ​ທ່ອງ​ທ່ຽວ​ຕ່າງ­ປະ­ເທດ 306.903 ຄົນ ເນື່ອງ​ຈາກ​ປີ 2019 ເປັນ​ປີ​ທ່ອງ​ທ່ຽວ ລາວ-ຈີນ ພັກ-ລັດ­ຖະ­ບານ​ໄດ້​ສົ່ງ­ເສີມ​ວຽກ​ງານ​ການ­ທ່ອງ­ທ່ຽວ​ທີ່​ເປັນ​ປາຍ​ແຫຼມ ແລະ ຈຸດ​ສຸມ​ວຽກ​ງານ​ເສດ­ຖະ­ກິດ​ຂອງ​ຊາດ ເປັນ​ການ​ປະ­ກອບ­ສ່ວນ​ເນື່ອງ​ຈາກ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ຖື​ເອົາ​ວຽກ​ງານ​ການ­ທ່ອງ­ທ່ຽວ​ເປັນ​ບຸ­ລິ­ມະ­ສິດ​ອັນ​ສຳ­ຄັນ ໃນ​ເດືອນ​ພະ­ຈິກ​ຫາ​ເດືອນ​ທັນ­ວາ 2019 ສະ­ພາບ​ນັກ​ທ່ອງ​ທ່ຽວ​ທີ່​ມາ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ 3 ແຫ່ງ​ນີ້​ມີ​ການ​ຂະ­ຫຍາຍ­ຕົວ ນັກ​ທ່ອງ​ທ່ຽວ​ທີ່​ມາ​ທ່ຽວ​ຊົມ​ອັນ​ດັບ​ໜຶ່ງ​ແມ່ນ​ເກົາ­ຫຼີ ຖັດ​ດລົງ​ມາ​ແມ່ນ ຈີນ ແລະ ໄທ ມີ​ບໍ­ລິ­ສັດ​ທ່ອງ​ທ່ຽວ ໄດ້​ນຳ​ເອົາ​ນັກ​ທ່ອງ​ທ່ຽວ​ຈາກ​ຈີນ​ເຂົ້າ​ມາ ໂດຍ​ລວມ​ແລ້ວ​ເລີ່ມ​ແຕ່​ທ້າຍ​ປີ 2019 ມີ​ນັກ​ທ່ອງ​ທ່ຽວ​ຈີນ​ເຂົ້າ​ມາ​ທ່ຽວ​ສະ­ຖານ­ທີ່​ທ່ອງ​ທ່ຽວ 3 ແຫ່ງ​ນີ້​ມີ​ຈຳ­ນວນ​ຫຼາຍ ສ່ວນ​ນັກ​ທ່ອງ​ທ່ຽວ​ຕາມ​ຊາຍ​ແດນ​ແມ່ນ​ມີ​ໜ້ອຍ ເຊິ່ງ​ມັນ​ສະ­ແດງ​ໃຫ້​ເຫັນ​ຕົວ​ເລກ​ນັກ​ທ່ອງ​ທ່ຽວ​ເດືອນ​ພະ­ຈິກ 2019 ມີ​ທັງ​ໝົດ 71.600 ຄົນ ໃນ​ນັ້ນ ນັກ​ທ່ອງ​ທ່ຽວ​ຕ່າງ­ປະ­ເທດ 62.700 ຄົນ ແລະ ເດືອນ​ທັນ­ວາ 2019 ມີ​ທັງ​ໝົດ 87.900 ຄົນ ໃນ​ນັ້ນ ນັກ​ທ່ອງ​ທ່ຽວ​ຕ່າງ­ປະ­ເທດ 77.500 ຄົນ ສະ­ເພາະ​ເດືອນ​ມັງ­ກອນ 2020 ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ຊົມ​ທັງ​ໝົດ 90.020 ຄົນ ໃນ​ນັ້ນ ນັກ​ທ່ອງ​ທ່ຽວ​ຕ່າງ­ປະ­ເທດ 80.700 ຄົນ ທຽບ­ໃສ່​ເດືອນ​ດຽວ​ກັນ​ປີ 2019 ເພີ່ມ​ຂຶ້ນ 8.720 ຄົນ (ເດືອນ​ມັງ­ກອນ 2019 ມີ 81.300 ຄົນ) ໃນ​ນັ້ນ ນັກ​ທ່ອງ​ທ່ຽວ​ຕ່າງ­ປະ­ເທດ​ເພີ່ມ​ຂຶ້ນ 8.900 ຄົນ ແຕ່​ພາຍ­ຫຼັງ​ທີ່​ມີ​ພະ­ຍາດ​ອັກ­ເສບ​ປອດ​ເຊື້ອ​ຈຸ­ລາ​ໂຣກ​ສາຍ​ພັນ​ໃໝ່ (ໄວ​ຣັດ​ໂຄ​ໂຣ​ນາ) ເກີດ​ຂຶ້ນ ມາ​ຮອດ​ທ້າຍ​ເດືອນ​ມັງ­ກອນ​ຫາ​ຕົ້ນ​ເດືອນ​ກຸມ­ພາ​ກໍ​ຄື​ປັດ­ຈຸ­ບັນ​ນີ້ ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ໂດຍ​ສະ­ເພາະ​ນັກ​ທ່ອງ​ທ່ຽວ​ຈີນ​ຫຼຸດ​ລົງ​ຫຼາຍ​ເນື່ອງ​ຈາກ​ນັກ​ທ່ອງ​ທ່ຽວ​ມາ​ແບບ​ທົວ​ບໍ່​ຄ່ອຍ​ມີ​ຈະ​ມີ​ແຕ່​ແບບ​ສ່ວນ​ຕົວ​ເທົ່າ​ນັ້ນ ຈຶ່ງ​ເວົ້າ​ໄດ້​ວ່າ­ການ​ເກີດ​ພະ­ຍາດ​ດັ່ງ­ກ່າວ ແມ່ນ​ມີ​ຜົນ​ກະ­ທົບ​ຕໍ່​ການ­ທ່ອງ­ທ່ຽວ​ທົ່ວ​ໂລກ​ເວົ້າ​ລວມ ເວົ້າ​ສະ­ເພາະ​ກະ­ທົບ​ຕໍ່​ສະ­ຖານ­ທີ່​ທ່ອງ​ທ່ຽວ 3 ແຫ່ງ​ເຊັ່ນ​ດຽວ​ກັນ ຖ້າ​ຫາກ​ພະ­ຍາດ​ນີ້​ບໍ່​ຢຸດ ຍິ່ງ​ຈະ​ມີ​ຜົນ​ກະ­ທົບ​ຕໍ່​ໄປ​ແກ່­ຍາວ​ເວ­ລາ​ໄປ​ບໍ່​ວ່າ​ຈະ​ເປັນ​ການ­ທ່ອງ­ທ່ຽວ ແລະ ຄົມ­ມະ­ນາ­ຄົມ ແຕ່​ເຖິງ​ຢ່າງ­ໃດ​ກໍ​ຕາມ​ຫວັງ​ວ່າ​ອີກ​ບໍ່​ດົນ​ພະ­ຍາດ​ນີ້​ຈະ​ຖືກ​ຢັບ​ຢັ້ງ​ໄດ້ ແລະ ຈະ​ເຮັດ​ໃຫ້​ນັກ​ທ່ອງ​ທ່ຽວ​ສືບ­ຕໍ່​ມາ​ທ່ອງ​ທ່ຽວ​ລາວ ແຕ່​ນີ້​ຮອດ​ບຸນ­ປີ­ໃໝ່​ລາວ​ມີ​ຄວາມ​ຄຶກ­ຄື້ນ​ຂຶ້ນ​ອີກ.

 

ດາວໂລດແບບຟອມຂໍອະນຸຍາດ

ຊ່ອງທາງການເຊື່ອມຕໍ່

ສະຖິຕິຜູ້ເຂົ້າຊົມ

172224
ມື້ນີ້ມື້ນີ້38
ມື້ວານນີ້ມື້ວານນີ້69
ອາທິດນີ້ອາທິດນີ້334
ເອືອນນີ້ເອືອນນີ້345
ທັງໝົດທັງໝົດ172224

ຈຳນວນຄົນອອນໄລ໌ທ

ມີ 8  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌