ຄາຣາວານລົດຖີບທ່ອງທ່ຽວສູ່ພິທີປ່ອຍປາບຶກ

ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ (ຖວທ.ນວ) ຮ່ວມກັບຫ້ອງການ ຖວທ, ຫ້ອງການກະສິກໍາ ແລະ ປ່າໄມ້ ເມືອງ ສີໂຄດຕະບອງ ແລະ ສະຫະພັນກິລາຖີບລົດ ນວ ຈັດຂະບວນລົດຖີບສູ່ບ້ານອ່າງໃຫຍ່ ເພື່ອເຂົ້າຮ່ວມພິທີປ່ອຍປາບຶກປະຈໍາປີ 2019 ຢູ່ວັດໂພນສະຫວ່າງ, ເມືອງ ສີໂຄດຕະບອງ ເພື່ອສົ່ງເສີມການທ່ອງທ່ຽວ ຕິດພັນກັບການຮັກສາສັດນໍ້າ ໂດຍສະເພາະປາບຶກໃຫ້ມີຄວາມຍືນຍົງ.

ພິທີດັ່ງກ່າວ ໄດ້ຈັດຂຶ້ນໃນວັນທີ 19 ກຸມພາ 2019 ຢູ່ອະນຸສອນສະຖານເຈົ້າຟ້າງຸ່ມ ໂດຍມີ ທ່ານ ຄໍາປະດິດ ເຂັມມານິດ ຫົວໜ້າພະແນກ ຖວທ.ນວ ມີຕາງໜ້າຫ້ອງການ ຖວທ, ຫ້ອງການກະສິກໍາ ແລະ ປ່າໄມ້ ເມືອງສີໂຄດຕະບອງ ແລະ ສະຫະພັນກິລາຖີບລົດ ນວ ພ້ອມນັກກິລາຖີບລົດຈາກພາກສ່ວນຕ່າງໆຫຼາຍກວ່າ 60 ຄັນ ເຂົ້າຮ່ວມ.

ຂະບວນລົດຄັ້ງນີ້ ໄດ້ເລີ່ມເຄື່ອນຈາກອະນຸສອນສະຖານເຈົ້າຟ້າງຸ່ມໄປຫາບ້ານອ່າງໃຫຍ່ ເມືອງສີໂຄດຕະບອງ ໄລຍະທາງປະມານ 23 ກິໂລແມັດ ຈາກນັ້ນກໍໄດ້ເຂົ້າສູ່ພິທີປ່ອຍປາບຶກ ໂດຍມີພະເຖລະນຸເຖລະ ເຈົ້າອະທິການວັດໂພນສະຫວ່າງ ບ້ານອ່າງໃຫຍ່ ທ່ານ ບຸນທອງ ຊາພັກດີ ຮອງຫົວໜ້າກົມລ້ຽງສັດ ແລະ ການປະມົງ, ທ່ານຫົວໜ້າພະແນກ ຖວທ ນວ, ທ່ານ ຄໍາແທງ ດວງສິລິ ຮອງເຈົ້າເມືອງໆ ສີໂຄດຕະບອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ຄໍາພຸດ ຂອດຈັນທຶກ ນາຍບ້ານອ່າງໃຫຍ່ ກ່າວວ່າ: ວັງສະຫງວນບ້ານອ່າງໃຫຍ່ ແລະ ການປົກປັກຮັກສາປາບຶກມີຄວາມຍາວ 350 ແມັດ ກວ້າງ 250 ເລິກປະມານ 30-40 ແມັດ ລັກສະນະພິເສດຂອງວັງມີໂງ່ນຫີນ ແລະ ດອນຫາດຊາຍສະຫຼັບສັບຊ້ອນລຽນກັນໄປຕາມແລວທາງນໍ້າ ປີ 2015 ພະອາຈານ ສວນຈັນ ເພັງຄໍາໄສ ເຈົ້າອະທິການວັດບ້ານອ່າງໃຫຍ່ໄດ້ເປັນຜູ້ລິເລີ່ມປ່ອຍປາບຶກເພື່ອທົດແທນຄວາມເສຍຫາຍຂອງປາທີ່ຖືກລ່າຈາກຊາວປະມົງ ຈາກນັ້ນມາ ກໍໄດ້ມີການຈັດກິດຈະກໍາປ່ອຍປາມາເລື້ອຍໆ ໃນມື້ຂຶ້ນ 15 ຄໍ່າ ເດືອນ 3 ເພັງຂອງທຸກໆປີ ນັບແຕ່ປີ 2015-2018 ອໍານາດການປົກຄອງເມືອງ ແລະ ບ້ານໄດ້ຮ່ວມກັນຈັດພິທີປ່ອຍປາບຶກລົງສູ່ວັງສະຫງວນມາແລ້ວ 3.300 ໂຕ ລວມມູນຄ່າ 149.200 ບາດ ຫຼື ປະມານ 40,92 ລ້ານກີບ ສໍາລັບປີ 2019 ຄາດຄະເນ ຈະປ່ອຍໃຫ້ໄດ້ 800 ກວ່າໂຕ ເພື່ອເຮັດໃຫ້ວັງສະຫງວນແຫ່ງນີ້ມີສັດນໍ້າທີ່ອຸດົມສົມບູນ ໂດຍສະເພາະປາບຶກເພີ່ມຂຶ້ນເລື້ອຍໆ ເພື່ອກາຍເປັນສິ່ງດຶງດູດໃຫ້ນັກທ່ອງທ່ຽວໄດ້ເຂົ້າມາຢ່ຽມຊົມ.

ຊ່ອງທາງການເຊື່ອມຕໍ່

ຈຳນວນຄົນອອນໄລ໌ທ

ມີ 13  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ

129137
ມື້ນີ້ມື້ນີ້154
ມື້ວານນີ້ມື້ວານນີ້187
ອາທິດນີ້ອາທິດນີ້96
ເອືອນນີ້ເອືອນນີ້2275
ທັງໝົດທັງໝົດ129137